అక్షర యోధుడికి అరుదైన గౌరవం: సీనియర్ జర్నలిస్ట్ ధన్నారపు రాజలింగానికి గౌరవ డాక్టరేట్ పాతికేళ్ల నిబద్ధత.. ప్రజా సమస్యలపై రాజీలేని పోరాటం ఢిల్లీలో అవార్డుతో సత్కరించిన మ్యాజిక్ బుక్ ఆఫ్ రికార్డ్స్

కామారెడ్డి, తెలంగాణ ఎక్స్ ప్రెస్ ప్రతినిధి 11అక్టోబర్

కామారెడ్డి జిల్లా వ్యాప్తంగా సర్వత్రా హర్షాతిరేకాలు
నిజాయితీతో కూడిన పాత్రికేయ ప్రస్థానానికి, రాజీ లేని ప్రజాపక్ష పోరాటానికి జాతీయ స్థాయిలో సముచిత గుర్తింపు దక్కింది.సమాజ హితమే శ్వాసగా, అట్టడుగు వర్గాల గొంతుకగా వార్తా కథనాలను అల్లే కామారెడ్డి పట్టణానికి చెందిన ప్రముఖ సీనియర్ జర్నలిస్ట్ ధన్నారపు రాజలింగం ప్రతిష్టాత్మక గౌరవ డాక్టరేట్ పురస్కారాన్ని అందుకున్నారు. దేశ రాజధాని ఢిల్లీ వేదికగా నిర్వహించిన ప్రత్యేక కార్యక్రమంలో ఆయనకు ఈ అవార్డును ప్రదానం చేశారు.

పాతికేళ్ల నిరంతర కలం కవాతు జర్నలిజం రంగాన్ని కేవలం ఒక వృత్తిగా కాకుండా, సామాజిక బాధ్యతగా స్వీకరించిన రాజలింగం గత 25 సంవత్సరాలుగా క్షేత్రస్థాయిలో నిరంతరాయంగా సేవలందిస్తున్నారు. ప్రస్తుతం 'నేటి మనదేశం' తెలుగు దినపత్రికలో గత 15 ఏళ్లుగా కామారెడ్డి జిల్లా స్టాఫర్‌గా బాధ్యతలు నిర్వర్తిస్తున్నారు. స్థానిక సమస్యలు, పాలనా యంత్రాంగం నిర్లక్ష్యం, సామాజిక రుగ్మతలను వెలికితీస్తూ అధికారుల దృష్టికి తీసుకెళ్లడంలో ఆయన కలం ఎప్పుడూ ముందుంటుంది. కేవలం రోజువారీ నివేదికలకే పరిమితం కాకుండా, సమాజానికి మేలుచేసే నిర్మాణాత్మక కథనాలు, పరిశోధనాత్మక శైలితో పాఠకుల్లో తనకంటూ ఒక ప్రత్యేక ముద్ర వేసుకున్నారు.

ఢిల్లీలో ఘన సన్మానం పాత్రికేయ రంగంలో ఆయన అందించిన సుదీర్ఘ సేవలు, సమాజంపై ఆయన కథనాలు చూపిన ప్రభావాన్ని సమగ్రంగా పరిశీలించిన ఢిల్లీ ఎన్‌సీఆర్‌కు చెందిన ప్రముఖ సంస్థ 'మ్యాజిక్ బుక్ ఆఫ్ రికార్డ్స్' ఆయనను ఈ అవార్డుకు ఎంపిక చేసింది. సంస్థ చైర్మన్ డాక్టర్ సి.పి. యాదవ్ చేతుల మీదుగా రాజలింగం గౌరవ డాక్టరేట్ ప్రదాన పత్రాన్ని, పురస్కారాన్ని స్వీకరించారు.

బాధ్యత మరింత పెరిగింది: ధన్నారపు రాజలింగం అవార్డు అందుకున్న అనంతరం రాజలింగం మాట్లాడుతూ, పాతికేళ్ల తన అక్షర ప్రయాణానికి ఈ స్థాయి గుర్తింపు లభించడం మాటల్లో చెప్పలేని ఆనందాన్ని ఇచ్చిందని పేర్కొన్నారు. "ఈ పురస్కారం నా వ్యక్తిగత గుర్తింపు మాత్రమే కాదు; ప్రజా సమస్యల పరిష్కారంలో నా కలంపై ఉంచిన నమ్మకానికి ప్రతీక. ఈ గౌరవం నన్ను సంతృప్తితో ఆగిపోనివ్వదు, బాధ్యతను రెట్టింపు చేసింది. రాబోయే రోజుల్లోనూ పేదల పక్షాన, నిజాయితీతో కూడిన విలువలతో పాత్రికేయ బాధ్యతలు నిర్వహిస్తాను" అని స్పష్టం చేశారు.

వెల్లువెత్తిన అభినందనలు జిల్లా కేంద్రానికి చెందిన సీనియర్ జర్నలిస్ట్ జాతీయ స్థాయిలో డాక్టరేట్ అందుకోవడం పట్ల కామారెడ్డి జిల్లా వ్యాప్తంగా జర్నలిస్టు లోకం, ప్రజా సంఘాలు హర్షం వ్యక్తం చేస్తున్నాయి. పలువురు ప్రజాప్రతినిధులు, జర్నలిస్టు సంఘాల బాధ్యులు, వివిధ శాఖల అధికారులు, ఆత్మీయులు, మిత్రులు ఆయనకు శుభాకాంక్షలు తెలియజేస్తూ అభినందనల్లో ముంచెత్తారు.