కాంగ్రెస్ పార్టీని మరింత బలోపేతం చేయడానికి నాయకులు, కార్యకర్తలు సమష్టిగా కృషి చేస్తామని న్యాల్కల్ మండల, జహీరాబాద్ పట్టణ అధ్యక్షులు కొత్తపల్లి భాస్కర్ రెడ్డి, నరేష్ గౌడ్ అన్నారు. పార్టీ శ్రేయస్సు దృష్ట్య అందరూ కలిసి ముందుకు సాగుతామని వారు తెలిపారు.
జహీరాబాద్ పట్టణంలోని మాజీ మంత్రి డా. చంద్రశేఖర్ క్యాంప్ కార్యాలయంలో జరిగిన పాత్రికేయుల సమావేశంలో నూతనంగా ఎన్నికైన అధ్యక్షులు ఈ వ్యాఖ్యలు చేశారు. పార్టీ అధిష్టానం తమకు అప్పగించిన బాధ్యతలను సమర్థవంతంగా నిర్వర్తిస్తూ, పార్టీ ఆదేశాలు, నాయకత్వ సూచనల మేరకు పనిచేస్తామని వారు పేర్కొన్నారు.
రాష్ట్ర ప్రదేశ్ కాంగ్రెస్ కమిటీ అధ్యక్షుడు మహేష్ కుమార్ గౌడ్, జిల్లా అధ్యక్షుడు నిర్మల జగారెడ్డి, స్థానిక ఎంపీ షేట్కార్, చైర్మన్ గిరిధర్ రెడ్డి, నియోజకవర్గ ఇంచార్జ్ డా. చంద్రశేఖర్ లకు కృతజ్ఞతలు తెలిపారు. వారి మార్గదర్శకత్వంలో పార్టీ బలోపేతం కోసం కృషి చేస్తామని హామీ ఇచ్చారు.
గతంలో పనిచేసిన అధ్యక్షుల సూచనలను పాటిస్తూ, పార్టీ కార్యకలాపాలను ముందుకు తీసుకువెళ్తామని తెలిపారు. ప్రభుత్వం అమలు చేస్తున్న సంక్షేమ పథకాలు అర్హులకు సకాలంలో అందేలా చూస్తామని, పార్టీ సిద్ధాంతాలకు అనుగుణంగా పనిచేస్తామని వారు స్పష్టం చేశారు.
