మేడ్చల్ నియోజకవర్గ పరిధిలోని జవహర్ నగర్ ఫైరింగ్ కట్ట ప్రభుత్వ పాఠశాలను సందర్శించిన ఏఐఎస్ఎఫ్, సీపీఐ నాయకులు, విద్యార్థులకు అవసరమైన కనీస మౌలిక సదుపాయాలను వెంటనే కల్పించాలని ప్రభుత్వాన్ని కోరారు.
ఆల్ ఇండియా స్టూడెంట్స్ ఫెడరేషన్ (ఏఐఎస్ఎఫ్) మేడ్చల్ జిల్లా కార్యదర్శి అన్వర్, కమ్యూనిస్ట్ పార్టీ ఆఫ్ ఇండియా (సీపీఐ) మేడ్చల్ నియోజకవర్గ ఇంచార్జ్ తోటపల్లి శంకర్ (మాజీ ఎంపిటిసి) బుధవారం జవహర్ నగర్ లోని ప్రభుత్వ పాఠశాలను సందర్శించారు. పాఠశాలలోని మౌలిక సదుపాయాలను, మధ్యాహ్న భోజన నాణ్యతను వారు పరిశీలించారు.
తరగతి గదులు, తాగునీటి వసతి, మరుగుదొడ్లు వంటి అంశాలపై విద్యార్థులు, ఉపాధ్యాయులతో మాట్లాడి అక్కడి పరిస్థితులను తెలుసుకున్నారు. మౌలిక సదుపాయాల కొరత విద్యార్థుల చదువుపై ప్రభావం చూపుతుందని నాయకులు ఆందోళన వ్యక్తం చేశారు.
ప్రభుత్వ పాఠశాలల్లో చదువుకునే పేద, మధ్యతరగతి విద్యార్థులకు నాణ్యమైన విద్యతో పాటు మెరుగైన వసతులు కల్పించాల్సిన బాధ్యత ప్రభుత్వంపై ఉందని అన్వర్, శంకర్ అన్నారు. అధికారులు తక్షణమే స్పందించి, అవసరమైన చర్యలు చేపట్టాలని వారు డిమాండ్ చేశారు.
ఈ పరిశీలన కార్యక్రమంలో సీపీఐ జిల్లా కార్యవర్గ సభ్యులు నిమ్మల నరసింహ, కాప్రా మండల కార్యదర్శి దర్శనం యాదగిరి, గిరిజన సమైక్య జిల్లా ప్రధాన కార్యదర్శి వి. స్వరూప నాయక్ తో పాటు పలువురు నాయకులు, కార్యకర్తలు పాల్గొన్నారు.
